系时候返去宿舍，执埋包袱，准备返归。
我地宿舍楼系天井式噶设计，中间有块草地，草地上面整左几旧有半米高噶唔知乜九野植物，好似街边种住嚟装饰一样咁普通，住一楼D学生一好天就会拎D棉胎搭系上面晒，我一直都觉得佢地好勇敢，真系唔懔住系楼上D仆街想外边吐口水。
哇，搞乜len野啊，啱啱踏入宿舍楼，见到块草地，好似俾巨人进击过咁，乜len野都有，D人系咪黐胶线，满地噶试卷，每个角落噶课本，唔知边度嚟噶蕉皮，地拖，扫把，丢，连厕所门都有！谂得出噶，谂唔出噶，讲得出噶，讲唔出噶，都可以系宿舍呢快草地到搵到。
其实呢个进击噶画面都可以算系我母校斗门一中噶传统之一，每逢节假日前，期末考试前，都会发生好似暴乱一样噶暴动，丢，唔系好似，直头系啊，D人好似上晒身咁，系咁鬼叫，乱九咁吹口哨，拎到乜就丢乜，见到乜就掟乜，连厕所门都拆埋出嚟丢，认真夸张，不愧符合高考完暴乱噶节奏。
我原本都系D咁噶人，我记得有一次，暴乱发生系教学楼，斗一噶高一高二教学楼都系天井式设计（高三噶系山上，后边会提到），个一晚，晚自习紧噶时候突然停电喔，哇，咁噶天赐机会，班友仔仲唔发晒茅咁做嘢，我从来都未见过高一同高二会咁合拍，一齐丢野落教学楼围城噶天井，因为D当时噶高年级剩系识吓我地，一个戆九噶画面，大家十分有默契咁向中间掟嘢，书啊，凳啊，枱啊，地拖扫把之类不在话下噶啦，拎得起手噶都掟，何其壮观，何其快哉！
个时候噶我都好出力掟，睇住漫天噶纸碎，飘啊飘啊，后来发生一件小事，令我觉得自己做得好len错，之后好快有返电，掟嘢受到学校教职员工噶阻挠，场面一度受控，大家返到课室继续自修，就系晚修落课之后，走个阵，我见到扫地阿姨系一楼噶案发现场做紧清理，就系个阵，我心头促左一下，咁多垃圾，又纸又书又剩，点搞得掂啊，我唔知呢位扫地阿姨几时开始执手尾，亦唔知佢会执到几点，我唯一知噶就系我好似做得唔系好啱，唔系好似，系真系做len错晒，我无制止D人之余（根本制止唔到），连自己都衰埋一份，唉，当时个心真系好up。自从个次之后，我就再无掟过嘢，因为我会谂到之后执手尾噶阿姨会好辛苦，换住我系佢，我会觉得好麻烦，我唔想人地麻烦，所以自己要做好D。
返到嚟宜家呢个咁壮烈噶场面，只能又辛苦阿姨咯。
我住四楼，啱啱想上楼，就迎面撞到宿管阿伯，佢叫明叔，不过我就叫佢蛇仔明，个样系点，通常D宿管阿伯都系猥猥琐琐，麻麻甩甩咁，所以蛇仔明佢都唔例外，佢就系咁噶九样，一个五十零岁M字秃头噶老坑，个样好似只蜥蜴，好len样衰下。我对呢个阿伯无乜好感，唔知系咪我个名比较好听，晚晚我洗衫个阵佢都嚟抄我牌，话我迟洗衫，丢，先12点，迟条春啊。
“哇，考成点啊，未来噶大学生。”
我唔知蛇仔明系有心定无意咁问，但系，系宜家呢个时刻，就算系天王老子讲噶野我都系当佢有骨噶，我真系有种冲动想令佢因工伤而提早退休。
无同佢九话，俾只中指佢就上楼。
我住系四楼，410室，入嚟睇下，狼藉程度同出边块草地都有得挥喔，就差在未将D床推冧晒嗻，睇嚟我D舍友噶状态都唔错啊，考完之后仲咁好精力。我无乜嘢要执，收返D衫就准备行人。企定定，再睇左下眼，出到嚟再睇睇公共厕所，以前一班人系度打边炉（围住抽烟）噶胜地，再睇睇公共冲凉房，虽然系独立噶间隔，但系中间D挡板就俾人打到穿晒，系度冲过凉，咪过书，抽过烟，仲有开住个窗，对住女生宿舍唱歌添，拜拜啦，一切都要拜拜啦。
走出宿舍，余光瞄到对面饭堂一位老师系度安慰紧位祭晒缸噶女同学，高考期间老师都会着晒红色，算系鼓励学生喔，但系我就觉得红色系种攻击性噶颜色，如果有D学生因为考试唔理想，本来无咩野，出到嚟见到D红色之后，可能会即刻向D老师进击，就好似西班牙D斗牛，会因为见到D红色锦旗而愤怒咁冲向斗牛士。
讲返个条祭晒缸噶女同学，我无意咁听到个老师话：
“不要哭了，都考完了，过去了就别再想了，你已经很努力了。”
“我，，考，，不，，好，，呜呜呜呜。”个女学生继续祭缸，扯埋哮添。
